कोल्हापूर, दि. 4 (जिमाका) : प्रादेशिक परिवहन कार्यालयामार्फत नवीन दुचाकी नोंदणी मालिका MH09-HJ दिनांक 5 ऑगस्टपासून सुरु करण्यात येत असून संबंधित वाहन चालकांच्या पसंती क्रमांकाचे अर्ज 5 व 6 ऑगस्ट रोजी सकाळी 9.45 ते दुपारी 3 या वेळेत खिडकी क्र. 9 येथे स्वीकारण्यात येतील.
पसंतीचा नोंदणी क्रमांक घेण्यासाठी अर्जासोबत शासनाने विहित केलेल्या शुल्कानुसार त्या क्रमांकासाठी विहित असलेल्या मुळ रकमेचा Demand Draft (धनाकर्ष) जोडलेला असणे आवश्यक आहे. धनादेश किंवा पे ऑर्डर अर्जासोबत देवू नये. Demand Draft (धनाकर्ष) काढताना REGIONAL TRANSPORT OFFICE KOLHAPUR या नावानेच काढलेला असावा. इतर कोणत्याही नावे काढलेला धनाकर्ष स्वीकारला जाणार नाही. पसंतीच्या क्रमांकाच्या मूळ रकमेचा एकच Demand Draft (धनाकर्ष) 5 व 6 ऑगस्ट रोजी सकाळी 9.45 ते दुपारी 3 या वेळेत कार्यालयात सादर करावा. 6 ऑगस्ट रोजी सायंकाळी 5 वाजल्यानंतर पसंतीच्या क्रमांकाच्या सिंगल डी.डी. व लिलावात गेलेल्या क्रमांकाच्या याद्या प्रसिद्ध केल्या जातील.
धनाकर्षाच्या मागे अर्जदाराने नाव, मोटार वाहनाचा प्रकार, मागणी केलेला नोंदणी क्रमांक व आधार लिंक मोबाईल क्रमांक लिहिणे आवश्यक आहे. एखाद्या नोंदणी क्रमांकासाठी एकापेक्षा जास्त अर्ज प्राप्त झाल्यास त्या क्रमांकाचा लिलाव करण्यात येईल. त्यासाठी अर्जदाराने 7 ऑगस्ट रोजी जादा रकमेचा एकच स्वतंत्र Demand Draft (धनाकर्ष) बंद लिफाफ्यात सकाळी 9.45 ते दुपारी 3.30 या कालावधीत जमा करणे बंधनकारक राहील. एकापेक्षा जास्त अर्ज असलेल्या नोंदणी क्रमांकाचा लिलाव 7 ऑगस्ट रोजी दुपारी 4 वाजता कार्यालयाच्या सभागृहात घेण्यात येईल. फक्त अर्जदार व प्राधिकृत प्रतिनिधी यांनाच लिलावास उपस्थित राहण्याची परवानगी देण्यात येईल व लिलावास येताना अर्जदाराने ओळखपत्र आणणे आवश्यक आहे. तसेच प्राधिकृत प्रतिनिधी उपस्थित राहणार असल्यास त्यांच्याकडे प्राधिकारपत्रासह ओळखपत्र असणे अनिवार्य आहे. आकर्षक क्रमांकाची मागणी करताना आधारला संलग्न असलेलाच मोबाईल नंबर व पत्ता अर्जावर लिहावा, अर्जावर मोबाईल नंबर नसल्यास कोणताही हक्क आकर्षक क्रमांकावर राहणार नाही. तसेच यादीमध्ये संबंधिताचे नाव आले तरी त्यांना आकर्षक क्रमांक मिळणार नाही.
एकदा राखून ठेवलेला नोंदणी क्रमांक बदलून देता येत नाही. नोंदणी क्रमांक राखून ठेवलेल्या दिनांकापासून 180 दिवसाच्या आत नोंदणी करून नाही घेतला तर मालिका संपल्यानंतर राखून ठेवलेला नोंदणी क्रमांक आपोआप रद्द होईल व शुल्क सरकारजमा होईल. विशिष्ट नोंदणी क्रमांक राखीव ठेवण्यासाठी प्रदान केलेले शुल्क परत करता येणार नाही. वैयक्तिक अर्ज व आकर्षक क्रमांकाच्या फीचा धनाकर्ष वाहनधारकाने फी ची खात्री करूनच जमा करावा जरी नजर चुकीने धनाकर्ष घेतला गेला व नंतर पडताळणी करताना कार्यालयाच्या निदर्शनास आले तर लिलाव प्रक्रियेत अर्ज बाद करणेत येईल याची नोंद घ्यावी.
लिलाव प्रकरणी दुसरा डी.डी. सादर करताना मूळ रकमेचा जमा डी.डी. व दुसऱ्यांदा सादर केलेल्या डी.डी.ची रक्कम एकत्रित करुन जादा रक्कम देणाऱ्यास सदर क्रमांक देण्यात येईल. लिलावातील जादा रकमेचा एकच DD स्वीरकारण्यात येईल. वाढीव रक्कमेचा डीडी सादर करताना तो जाड अपारदर्शक लखोट्यामध्ये घडी करुन सीलबंद असावा जेणेकरुन बाहेरुन आतील रक्कम दिसणार नाही अशा स्वरुपात सादर करण्यात यावा. लिलाव प्रकरणी दुसऱ्या वेळीही समान रक्कमेचा डी. डी. आल्यास किंवा दुसऱ्या वेळी डी. डी. सादर न झाल्यास ज्या व्यक्तीने पहिल्यावेळी प्रथम डी. डी. सादर केला असेल त्याला हा क्रमांक देण्यात येईल. सध्या सुरु असलेली दुचाकी वाहन मालिका HH मधील उर्वरित क्रमांक संपल्यानंतर नवीन मालिका HJ फॅन्सी नंबर पोर्टलवर प्रदर्शित करण्यात येईल, असेही प्रादेशिक परिवहन कार्यालयामार्फत कळविण्यात आले आहे.
0000
